لحياة اكثر نجاحا … اربعة أشياء عليك التحلى بها

0 206

 

“اكبر مشكلة هى اعتقادنا بعدم وجود مشكلة  “

غير معروف .

       الحياة تمثل سلسلة من المشكلات فالانسان لا يسير فيها  عبر طرق معبدة وهذه هى الحقيقة  ولكن هل  نرغب حقا فى حلها ام تجاوزها  والتغاضي عنها ؟ 

التجاوز أو التغاضي عن المشكلة بمثابة مسكنات الالم التى تتعتمل مع العرض وليس المرض وما يلبث ان يعود الانسان بعد زوال مفعولها الى المه السابق . 

  مورجان سكوت بيك عالم نفسي حاول من خلال كتابه الطريق الطريق الاقل ارتيادا انه يضع اسس انضباط الذاتي والى ممكن الانسان من خلاله يتغلب علي مشاكل الحياة . 

والانضباط دا بيتحقق من خلال اربع امور 

تأخير الرضا

  • الاهم اولاً . كلنا بنحب الجاتوة وكلنا بنحب طبقة الشيكولاته الى بتبقى عليه من فوق ، حياتنا اليومية شبه قطعة الجاتوة بتتاكل على بعضها بس ايه الى نبدأ بيه ؟؟؟ واحنا اطفال يمكن كنا بنعرف نعمل دا بنبدأ بالصعب يعنى ناكل الكيك الاول وبنأخر طبقة الشيكولاته للاخر علشان نستمتع بيها فى النهاية ، بس لما كبرنا بقينا بنعكس الموضوع نعمل الاسهل وبعد كدا نخلى الحاجة الاهم والاصعب الاخر يعنى بناكل الشيكولاته الاول والكيك اخليه فى الاخر أو مش باكله فى النهاية . اخرج مع صحابي الاول واذاكر اخر اليوم ، والمذاكرة أبدأ بالاسهل واخلى الصعب بعدين وبوستات المفروض اقراها وبعملها save دا غير bookmark الى على الرف وهكذا . يعنى بعبارة بسيطة ” أعبث الان وادفع الثمن لاحقاً ” 😥😥
  • الطبيعى اننا نبدأ يومنا بالأكثر أهمية ثم الأقل ثم الأقل ، ودا بيحسسنا براحة نفسية أننا أنجزنا أهم شيء ودا بيخلينا ننجز باقى المهام بكل سهولة لان اصعب حاجة عدت خلاص عكس لو أجلنا حاجة مهمة لآخر اليوم بنفضل قلقانين منها طول الوقت . علشان كدا بيقولوا “ساعة من الألم يعقبها ست ساعات من الراحة خير من ساعة من الراحة يعقبها ست ساعات من الألم ” .
للمزيد °° ☆☆ كتاب الأهم أولا لستيفن كوفى . ☆☆ كتاب إبدا بالأهم ولو كان صعباً لبراين تريس .

 تحمل المسئولية

متقدرش تحل أي مشكلة وأنت لسه بتقول مش مشكلتى مش انا السبب لان ببساطة محدش هيحل مشاكلك غيرك ، متستناش حد يجي ويساعدك ، انت الى تساعد نفسك لو عندك مشكلة في تعلم اللغة متقولش مكان الكورسات بعيد ، أصل الحظر منعنى ….الخ من الحجج لان صاحب الكورس مش هيجي يفتح تحت بيت حضرتى وحضرتك . ولا الحكومة هتقلل ساعات الحظر علشان انت تنزل تتعلم انت لازم تدور على بديل وهتلاقيه بأذن الله . وافتكر دايما كلام ألدريج كليفر … صحيح هو مين كليفر دا … ما علينا 😅😅 المهم هو قال ” ان لم تكن جزء من الحل فأنت جزء من المشكلة “
للمزيد °° ☆☆ كتاب من الذي حرك قطعة الجبن الخاصة بي سبنسر جونسون . ☆☆ كتاب هذه حياتك لا وقت للتجارب جيم دونافان .

 

 الإخلاص للحقيقة


الإخلاص للحقيقة هو انك تكون صادق مع نفسك ,ودا معناه انك تكون واقعى قصة الصياد الى لقى خاتم المعجزات وهو بيفتح السمكة قصة جميلة لنها غير واقعية وبالرغم من دا ناس بتبقى متوقعى ضربة حظ زى دى تعلم الإنجليزية في 7 أيام ، ازاى تخس عشروميت كيلو فى اسبوع ، كيف تصبح مليونير وتكتشف ان الراجل كان مفلس وبقى مليونير من بيع الكتاب دا ….الخ من الجنان الى بتشوفه . جزء كبير من مشاكلنا النفسية هى ان الحقيقة كانت بخلاف توقعاتنا .
 
 

  الموازنة

ودى بتخص اكتر مشاكل العلاقات العاطفية ❤💔 أن يكون عندنا مرونة في التعامل مع الطرف الاخر احنا لما بنركب الدراجة بنستمتع واحنا نجري بيها على اقصي سرعة بس أكيد بنضغط على الفرامل لما بندخل على منحنى بسبب خوفنا من أنها تنحرف عن الطريق ودا بيتعارض مع متعتنا أننا نجري بسرعة كبيرة . فكل مشكلة ندخل فيها مع شريك حياتنا مش شرط ننتصر فيها لنفسنا بالعكس أوقات كتيرة الفرامل الى بندوس عليها بتكون انتصار لنفسنا في النهاية . تميم البرغوثى كان بيقول “بعض المعارك في خسرانها شرف من عاد منتصراً من مثلها قد انهزما ” . الفرامل بتنقذ علاقات كتير وبتنقذنا معاها . الفرامل بتستخدم عند اللزوم مش بنضغط عليها باستمرار ولا بنستغنى عنها تماماً . 

فى النهاية معظم مشاكلنا بتكون عبارة حيل نفسية مخنا بيحاول يسكن الالم بيها [ يأجل المشكلة ويتجاهلها – يقولك انت كويس – انت مش سبب المشكلة – متعتذرش انت مغلطش – يخلقلك حالة من الخيال علشان تعيش فيه وكل دا علشان تشعر براحة ] لذلك كل الحلول كانت ازاى نتغلب على الحيل النفسية الى هى اصلاً سبب المشاكل .

Leave A Reply

Your email address will not be published.